سيساوى.. تحت شعار هشتكنا وبشتكنا ياريس دا انت رئيس والنعمة كويس ..

حـــوللي شكــــــراً .. طــــاب رن واقفـــــــل

أكيد الكل تابع الكلمة العظيمة للرئيس السيسي في مؤتمر الأهداف الانمائية 2030 (يدينا ويديكوا طولة العمر) وبعيدا بقي عن انه مش شايف مشكلة مياة ولا انه هايمحي المعارضة وزعلان علي الانجازات الكتير اللي اتعملت في السنتين اللي فاتوا والناس مش مقدراها وبالمناسبة الانجازات دي عبارة عن طرق وكباري بتنهار وبتقع من بعد انشائها بفترات بسيطة… ركز علي جزئية مهمة جدا، ان بح مافيش فلوس ومافيش اقتصاد، وفيه ازمة في السلع الاستراتيجية وازمة دولاريه وازمة منيلة بستين نيلة، رغم الانجازات المذكورة.

 وفي لحظة انفعاليه نادرة الحدوث تهتز لها الاركان ويشيب لها الولدان (حلوة دي) طلب حضرته مننا نصبح علي مصر برسالة بجنية اسهاما من الشعب المتطلب في انقاذ مصر لاننا عارفين طبعا ان مصر هي امي وهو جوز امي وكده...

 .. بس في سؤال بصراحة بيلح عليا .. 

.هي الفلوس اللي اتلمت من ساعة ما مسك البلد.
.... راحت فين؟؟ ....

.. 450 مليار معاشات راحت في البورصة (الحاجه غادة والي فكتها من المعاشات كانها باعت حتتين الصيغة بتوعها علشان تنقذ المعلم)، 250 مليار صناديق خاصة، 14 مليار اعفاء للمعلم ساويرس، 20 مليار اسلحة وطيارات، 8 مليار فلوس وديعة حرب العراق ، 65 مليار حفر تفريعة قناة السويس (سبب خراب الدولار)، 60 مليار معونات من الخليج (رز وكبسة)، 75 مليار فلوس مبارك وعيالة اللي برة (اللي مش هانطولهم لانهم طلعوا براءة يعني الراجل طلع شقيان بيهم)، 100 مليون معونة للبنك الافريقي (شحات ونزهي)، 10 مليون معونه للكونغو .. وفلوس بالمليارات زهقت من اني اقعد اعددها (كل دة في سنتين ونص).

 *** غير كده، المياة غليت، الكهربا غليت، السلع غليت، الضرايب غليت، التامينات غليت، البنزين غلي، وفي مقابل الضنك ده (في الاسبوع ده بس) هيئة الملاحة الجوية صرفت 10 شهور مكافأة للعاملين ، السادة العاملين في القضاء صرفوا 6 الاف جنية بدل مصيف اسوة بالسادة القضاة، دا غير السبعتلاف مكافاة وبدل اللي خدوها من ساعه الزند مابقي وزير عدل. 

 الاقتصاد المصري اصبح اقتصاد كل ايشي ان كان بيعتمد علي التبرعات وجباية الضرايب من مواطنيه ورفع الدعم ولا عزاء طبعا للسياحة والصناعة والتجارة والاستيراد والتصدير وكمان واضح ان الاقتصاد البايظ ده مابيشيلش عواقبه غير الغلبان الانسان العادي وواضح ان سيادة الريس عينيه مش شايفه غير السادة نخبة المؤيدين اللي بيصقفوله علي كل كلمة وبيشكروه علي كل خطاب سمعوه او ماسمعوهوش تحت شعار هشتكنا وبشتكنا ياريس دا انت رئيس والنعمة كويس.