عــــذرا لرجــــال المنـــاطق الشعبيــــة
أنا سني حاليا 29 سنة بعتبر نفسي من الناس او البنات اللي ليها راي مميز احيانا على الاقل فيما يخصني ،، أنا شايفة ان قرار الزواج مثلا لازم يكون قراري لواحدي وبدون ضغوط من الأهل كالعادة .. .. لكن مشكلتي دلوقتي اني من اسرة لها جذور أرستقراطية جداً ومازلنا والحمد لله وهذه الجذور منعتني كثيرا من الارتباط بشاب حبيته في يوم من الايام لكنه كان من مستوى اجتماعي اقل ويسكن احد المناطق الشعبية وللسبب ده أهلي رفضوه وباظت الجوازة طبعا .. لكن بعد ما كبرت حسيت ان الامور دي مش هية المقياس الحقيقي لتقييم الشاب وانه فيه حاجات كتير تانية اهم صحيح أنا عرفت ناس حياتهم فشلت بسبب الفروق وعارفة ان ربنا خلق الناس درجات لكن من شهور حبيت شاب واتعلقت بيه جداً وبرضه كان نفس الظروف متعلم وكل حاجة لكن من سكان منطقة شعبية واضح كدة اني بحب الراجل الشعبي او ابن البلد زي ما بيقولوا .. المهم كالعادة دخلت في حوار فاشل مع أهلي عشان أقنعهم بيه ومع الضغط عليهم وافقوا بشكل مبدئيي وشرطوا علية وقالوا إحنا هنراقب سلوكه لو لقينا في اي مشكلة انسي الجوازة دي.. بيني وبين نفسي قلت دي خطوة معقولة وانا من ناحيتي هحاول اعمل جو لطيف بينهم يمكن ربنا يكرم .. ده حصل فعلا لكن أنا نفسي اتفاجئت بتصرفات الشاب ده وطريقة كلامه خصوصا في لحظة الزعل او الخلاف ... لقيته مرة بينبهني على تصرف معين بطريقة حقيرة جداً ( جرى ايه يا ولية ماتلمي نفسك ) بيني وبينكم أنا سمعت الكلمة وجالي بعدها صدمة
وقلت يانهار اسود أنا بقى اسمي الرسمي دلوقتي ولية ؟!!
امال لو اتجوزنا هيناديلي بايه ؟ يا زفتة ؟
المهم جيت على نفسي شوية وقلت يمكن ذلة لسان ... مافتش كام يوم واتفاجئ بطريقة تانية ... نزل يشتري وانا معاه علبة جاتو عشان كنا في مشوار وراجعين على بيت أهلي واحنا خارجين من المحل جه يسأله متسول بيقوله اي حاجة اكلها يا بيه راح رادد عليه ( اكلتك عقربة يابن ال .....) وشتيمة رهيبة وصوته طبعا عالي اتفضحنا في الشارع ..
الغريب اكتر بقى ان لكنته نفسها عجيبة ومش عارفة ازاي ما اخدتش بالي من ده في الاول عنده حروف بيعظمها وحروف تانية بيرققها ده غير الفتاوي في اللغات وياريت بيقول صح انما العنطزة اللي مش فاهمة لازمتها .... شوفوا .... أنا في يوم من الايام كنت فاكرة ان أهلي عندهم شئ من الشعور بالطبقية لكن بعد ما مريت بتجربتين من نفس النوع اكتشفت ان المناطق الشعبية عايزالها ستات من طراز خاص ومختلف أنا مش منه .. ومشكلتي دلوقتي هي ازاي أواجه أهلي بفسخ الخطبة ومنظري قدامهم هيبقى سئ وهيفرحوا فية طبعا تفتكروا الحل ايه ومعذرة للقراء الذين ينتمون الى مناطق شعبية..
نيفين حجازى
ليست هناك تعليقات:
إرسال تعليق