عريس مصر .... القادم
عريسك يامصر
لازم يكون .. موظف إدارجي عظيم الفنون
عريسك يامصر
لازم يكون .. موظف إدارجي عظيم الفنون
عريسك يامصر
ياست العرايس
مفلس ومشيخ وهايص ولايص
وفيه الممثل وفيه الهجايص
وفيه الكِشر .. ووشه عِكر
وفيه اللي ناعم
وفيه اللي مايص
وعايش في بدلة حبيبنا جمال
ولكن كلامه بعيد الاحتمال
لأن اللي مات مستحيل يتبعث
وشغل النضال ده ..ده أصبح محال
***
وواحد يقول ده بعتني النبي
وقصر الرياسة ده فيه ملعبي
مفكر يامصر إن شعبك غبي
هايقبل رئيسه يكون له رئيس
ببوس الأيادي
كلي واشربي
***
وواحد شغلنا بلامشغلة
يمثل علينا كلام حنجلة
وينفخ سيجاره وعامل ولا
كأن الرياسة
بتاعت أبوه
وأحنا ياعيني قطيع في الفلا
***
وواحد ده ساكت وعامل شجيع
مخاصم حبايبه وباين وديع
وعند الرئاسة هايقلب بديع
يقطّع أيادي ويرجم في ناس
وشعبك يامصر مسالم مطيع
***
وواحد قراري وفل الفلول
وداخل بصدره وفشره المهول
ويلبس بلوفر ويطلع يقول
أنا الرئيس الأنيس النميس
وكل العيال دي ناقصة عقول
***
عريسك يامصر ده لازم يكون
موظف إدارجي عظيم الفنون
يحبك وشعبك وعاقل حنون
وعارف بأِنه في يوم نفترق
ولو كان يحبك لحد الجنون..
ليست هناك تعليقات:
إرسال تعليق