الأربعاء، 15 يونيو 2011

خلى ابنك بيك يتفاخــــر . وسامحنى لأنى كنت جبان


وأتفض شــباب مصــر وخرج المــارد 
وأنتفض الشاعر/ راضى على أحمد حسين
 قصيدة "اعتذار إلى ابنى"


اعذرنى يا ابنى مكسوف منك وسامحنى لأنى كنت جبان 
كنت بشوف الباطل يرقص أغنى وأعزف ليه ألحـــــان 
كان الحق يضيع قدامـى مكنتش أنطق حتى بيـان 
مكنتش أرفع أبدا ًصوتى كاتم همى وماشى زعلان 
كنت بقول الصبركويـس شايف موج الظلم طوفان 
كنت بقول أنا صاحب أسره خايف أضيع إزاى تتعان 
عشت ذليل وكنت خنوع وجوا بلادى مالاقى مكان 
شايف قوت أولادى منهوب وكروش مليانه زى حيتان 
كان الحرمان باين فيـــــكم وشايف بيتى كله جـــعان 
كنت بخدر روحى وساكت فول طعميه أقول شبعــان 
كان الحلم معاى متكتـف وحتى الشمس ماراضيه تبان 
كنت ببرم شنبى وماشى وعامل فيها أبوالشجعــان 
وأقول حريه أساس الفوضى عبوديه أحسن ويا أمـــان 
لكن يا ابنى صوتك جلجل وردك فتح فى البستــــان 
خليك راجل عيش بكرامه إياك تقبل يوم تتهـــــــان 
ارسم حلم المجد بإيــدك وبلدك اغزل ليها فستــان 
ارفع راسك عيش حريه صنعت بإيدك أحلى زمان 
إياك واحد يكرب موجتك ويقولك اسمى أبو الفرسان 
أنت يا ابنى الأسد المارد رفضت تعيش ذل وخذلان 
خلى ابنك بيك يتفاخــــر وسامحنى لأنى كنت جبان

ليست هناك تعليقات: